استنجدت فتاة من الإسماعيلية بوزارة الداخلية للقبض على بلطجي تعدي على شقيقها وسط الشارع وأحدث به عاهة.

وقالت الفتاة: "أنا آسفة على المشهد الصعب اللي هتشوفوه في الفيديو والصور، بس لازم أتكلم علشان أوصل صوت أخويا “أمير”، اللي اتعرض لحادث مأساوي من ولد بلطجي بدون ضمير.

وتابعت: “أخويا كان راجع البيت في أمان الله، وفجأة حد شتمه بألفاظ صعبة جدًا، فلما سأله “ليه بتشتمني؟” الولد ده هجم عليه، وكان ماسك أداة خشبية ضخمة واعتدى عليه بيها بشكل عنيف”.

واستطردت: "الضربة جات في وشه مباشرة من فوق الحاجب لآخره، وفتحتله جرح كبير، دخل غرفة العمليات، وتم استخراج القطعة الخشبية من وجهه، وكانت على بُعد سنتيمتر واحد فقط من عينه.. الحمد لله على ستر ربنا، بس للأسف أعصاب فوق حاجبه اتضررت، وبقى عنده شلل جزئي في المنطقة دي. والوجع النفسي اللي بيمر بيه أكبر من أي وصف… طفل عمره 14 سنة، ووشه اتشوّه".

وقالت: "هو دلوقتي في المستشفى وتحت الملاحظة، وحالته صعبة جدًا. أنا مش عارفة إزاي هيرجع لحياته، لمدرسته، أو يتعامل مع الناس وهو حاسس إنه مش قادر يبص في المراية..الشخص اللي عمل كده معروف، من منطقة سوق الجمعة، وبيتعاطى كل أنواع المواد الضارة، واسمه محمد عصام، وبيُعرف بـ”حنكيش”..أنا مش هتنازل عن حق أخويا، وربنا كبير، وهياخد حقه، والعدل هيتحقق إن شاء الله".