وجه المخرج عمرو سلامة رسالة قوية إلى لاعب نادي الزمالك أحمد سيد زيزو وذلك بعد تداول أخبار الفترة الماضية حول توقيعه للنادي الأهلي.

وكتب عمرو سلامة عبر صفحته الرسمية "فيس بوك"رسالة إلى زيزو، لازم تكون حاسس بفخر كبير. آه، رقميًا أنت من هدّافي الزمالك التاريخيين، وأرقامك مميزة وقياسية، لكن أظن الرقم القياسي الأهم هو عدد الساعات الإعلامية، وعدد نقاشات القهاوي والكافيهات، و عدد البوستات اللي على السوشيال ميديا، اللي الناس كلها كانت بتتكلم فيها عنك".

وتابع: "في آخر ست شهور، موضوع التعاقد مع زيزو كان نقاش متكرر أكتر من مواضيع في السياسة، والأحداث الإقليمية، والاقتصاد، والفن ، معتقدش إن في لاعب في تاريخ مصر حصل له كل ده. آه، كان في لعيبة ليهم لحظات مشابهة، لكن مش بنفس الزخم ده، لدرجة إن الزمالك والأهلي نسيوا إن الاتنين الاحتمال الأقرب مش هياخدوا الدوري السنة دي، وتحول انتصار الموسم ليهم هو مين هيمضي زيزو وكأن اللي كسبك كسب الدوري، كمان من مميزاتك إنك لاعب أغلب جماهير الفرق التانية ما بتكرهكش عمرك ما كنت مستفز، ولا أخدت موقف عدائي، ودي ميزة نادرة في الكورة ، بس للصدق، أنا كمشجع، ولأني ماعرفكش على المستوى الشخصي لسة للأسف، فحبّي ليك مشروط بإنك زملكاوي. ولو رحت الأهلي، أكيد هتكون فيه مشاعر غضب وإحباط وبسبب سذاجة المشجع الطبيعية، مش هفكر بقى في الاحترافية، ولا قادر استوعب إنك بتدور على مستقبل أفضل. ساعتها هشعر إنك خنتنا، وأعتقد ده هيكون شعور أغلب الزملكاوية".

وأضاف" بعد ما كنت معشوق جماهير فريقك، وتحترم من المنافس، هتبقى محبوب من جماهير الفريق الجديد، لكن مكروه بشدة من جمهورك الأصلي، خصوصًا بعد كل الجدل اللي حصل والمكايدة السودة المهببة اللي هتحصل، آه، من حقك تشوف مصلحتك، وتأمّن مستقبلك، وتطمع في اللي شايف انك تستحقه".

واختتم: "مشجع الكورة عاطفي، ومش كمان في الكورة مطلوب منه يفكر بعقلانية أو منطق، وواقعيًا؟ خليك في الزمالك يا زيزو. ملك في قرية، خير من أمير في مدينة آه احنا بالمقارنة قرية، بس قرية أهلها طيبين وحمولين وصبورين وحتى بنعمل ساعات من الغلابة رموز، إنما المدينة زحمة وعندها بدل الموهبة مية واقفين طابور، وما بترحمش، وما بتصبرش، ومابتسامحش، لأنها دايمًا، فوق الجميع".

علي جانب آخر كان أكد أحمد سالم، المتحدث الرسمي لنادي الزمالك، أن أحمد سيد زيزو لم يوقع للنادي الأهلي حتى الآن وأن المفاوضات مستمرة مع نادي الزمالك من أجل التجديد.

وأضاف أحمد سالم في تصريحات تلفزيونية: كل الأخبار المتداولة عن وجود أزمة بين الزمالك وأحمد زيزو في الفترة الحالية غير صحيحة، والأمور جيدة بين اللاعب والنادي.

وأضاف أن زيزو يريد الاستمرار في نادي الزمالك ومتمسك بالنادي والزمالك يريد استمراره وستكون هناك انفراجة  في المفاوضات بين زيزو والنادي.

واختتم سالم أن من يقول بأن زيزو وقع بشكل رسمي للنادي الأهلي أتمنى أن يظهر العقد الخاص بالنادي الأهلي، ولكن اللاعب لم يوقع للنادي الأهلي حتى الآن ونادي الزمالك متأكد من هذا الأمر.